Животот на една осумнаесетгодишна девојка одеднаш целосно ќе се промени кога ќе сфати дека ја демне и ја прогонува локален четириесет и тригодишен насилник, познат во нејзината средина како Млекарот. И покрај тоа што само неколкупати „случајно“ се среќаваат на улица, во квартот каде што живее девојката почнуваат да се шират озборувања за неа и Млекарот, па набргу сите нејзини пријатели, соседи и целото семејство се свртуваат против неа, без да постои реална причина за тоа.
Опишувајќи средина во која заедницата живее во постојана политичка тензија, во која сите се поделени на групи и не постојат неутрални, во која насилството е прифатено и пожелно кога се спроведува против „другите“, Ана Бернс во романот „Млекарот“ создава напната атмосфера на интриги, а во нејзиниот центар поставува една млада и исплашена, но сепак храбра девојка.

„Атмосферата во ‘Млекарот’ потсетува на делата на Стерн и на Бекет, но романот несомнено има своја посебна енергија, свој впечатлив глас. Иако навидум зборува за љубовните проблеми на една тинејџерка, книгата всушност е одек на низа политички и социјални случувања кои го потресуваат нашето современо општество.“
„Гардијан“

„Преку одлично изведен контраст меѓу црн хумор и страв, ‘Млекарот’ претставува своевидна студија на кризата, без оглед дали е таа душевна, индивидуална, семејна или колективна.“
„Тајмс“

За авторката:

Ана Бернс (1962, Белфаст) е писателка од Северна Ирска. Студира Руски јазик и литература во Лондон, а потоа се преселува во областа Сасекс во Англија, каде што живее и денес.
Авторка е на три романи и на една новела. Својот прв роман, Без коски, го објавува во 2001 година, а потоа следуваат Мали конструкции (2007) и Млекарот (2018), со кој постигнува светска слава. За Млекарот ги добива наградите „Букер“ (2018), „Орвел“ (2019) и меѓународната книжевна награда „Даблин“ (2020).

За преведувачката:

Катерина Јосифоска е родена во 1982 година во Скопје. Дипломирала во 2005 година на Филолошкиот факултет „Блаже Конески“ во Скопје, на Катедрата за општа и компаративна книжевност, а титулата доктор на науки ја стекнала во 2009 година на истиот факултет. Преведува од германски, шпански и англиски јазик. На македонски ги превела делата на Теодор В. Адорно, Валтер Бенјамин, Роберт Музил, Хана Арент, Франц Кафка, Зејди Смит, Роберто Болањо, Фернандо Арамбуру, Јан Асман, Даниел Келман… За својот преведувачки труд ги добила наградите „Пол Целан“ во 2012 и „Златно перо“ во 2015 година.

Авторка: Ана Бернс

Издавач: Арт Конект

Едиција: Измислени светови

Наслов на оригиналот: Milkman / Anna Burns

Превод: Катерина Јосифоска

Број на страници: 424

Формат: e-книга

Година: 2025

ISBN: 978-608-5058-28-0