Алона Кронина е млада украинска новинарка која започнува да работи во медиум под строга цензура, целосно контролиран од неговиот руски спонзор. За време на Евромајдан, таа сфаќа дека повеќе не може да биде само дистанциран набљудувач на настаните и дека сака да се бори против пропагандата на Кремљ и да им ја открие вистината на луѓето. Алона ќе изгради блескава кариера: ќе работи како новинарка во областа на информатичката технологија, како службеничка во украинскиот парламент и како разузнавачка агентка на МИ6 — и ќе се обиде да ја спречи руската инвазија врз Украина, која започна на 24 февруари 2022 година.

Романот се состои од четири дела, а секое поглавје соодветствува на досие за случај што го презема главната хероина. Романот не зборува само за современата украинска историја во периодот од 2012 до 2022 година; пред сè, тој го следи развојот на украинското новинарство и демократското општество. Авторката се обидува да одговори на прашањето зошто ниту цензурата, ниту пропагандата на Путин во украинските медиуми, ниту обидите украинските револуции да бидат задушени со сила, ниту присилната емиграција и војната не можат да ги скршат внатрешната сила и истрајноста на Украинците.

За авторката:

Анастасија Пика е современа украинска писателка и новинарка од Киев која живее и твори во Лондон. Повеќе од осум години работела како новинарка во различни киевски медиуми, а потоа била раководителка на одделот за медиуми во украинскиот парламент. Нејзиното богато новинарско искуство е силно присутно и во нејзиното книжевно творештво, во кое се занимава со теми како медиумската цензура, политичките превирања, општествените промени и емигрантскиот живот.

Пика е добитничка на повеќе литературни признанија, меѓу кои и награда на литературниот конкурс „Смолоскип“, а во 2017 година победила на конкурсот „Коронација слова“ за најдобар расказ за Киев. Нејзината дебитантска збирка раскази „Приказни кои никогаш не завршуваат“ влезе во поширокиот избор Книга на годината на Би-би-си во 2019 година. Авторка е и на политичкиот трилер „Последниот случај на новинарката Кронина“, роман во кој преку приказната на една млада новинарка ги истражува украинското новинарство, медиумската цензура и политичките и општествените превирања во Украина во периодот од 2012 до 2022 година.

За преведувачката:

Вера Чорниј-Мешкова е наградувана писателка, поетеса и преведувачка.

Има завршено план и анализа на економскиот факултет при Универзитетот „Св. Кирил и Методиј“ во Скопје, украински јазик и украинска книжевност на Институтот за украинска филологија при НПУ „М. П. Драгоманов“ во Киев, магистратура по украински јазик и книжевност на Институтот за украинска филологија на истиот универзитет, како и докторски испити на филолошкиот факултет на КНУ Тарас Шевченко. Докторанд е на Одделот за украински јазик на филолошкиот факултет при КНУ „Тарас Шевченко“ и на Институтот за уметност, фолклор и етнологија М. Т. Рилскиј на НАН на Украина.

Во академската 2013/2014 година таа го отвора првиот украински лекторат на филолошкиот факултет Блаже Конески при Универзитетот Св. Кирил и Методиј, каде што предава украински јазик, украинска книжевност и украинска култура и цивилизација.

Со Указ на Претседателот на Украина, на 17 Јануари 2008 година е наградена со Орден на Кнегињата Олга од трет степен, најпрестижна награда со која се наградува жена во Украина.

На 14 Октомври 2008, во Киев, наградена е со Орден на Св. Георги Победоносецот „Чест. Слава. Труд“ IV степен од Меѓународниот академски рејтинг на популарноста „Златна Фортуна“.

Член на Друштвото на писателите на Македонија и на Националниот сојуз на писателите на Украина. Пишува на македонски и на украински јазик. Авторка е на стихозбирките „Пластови на малото сонце“, „Жолти зрна“, „Зорница“ и други книги објавени на македонски јазик. Преведувачка е на многубројни дела од украински и руски јазик.

Авторка: Анастасија Пика

Превод од украински: Вера Чорниј-Мешкова

Издавач: ИД-Концепт

Едиција: Планета НАДЕЖ (Нова европска проза)

Жанр: роман

Формат: е-книга

Број на страници: 628

ISBN: 978-608-4673-65-1

Година на издавање: 2026