Кратките прози во збирката „Среќни падови“ се засновани на вистински луѓе и настани. Книгата ги истражува искуствата на жените од регионот Донбас кои поради војна се принудени да живеат како бегалки во Киев, но и во различни европски држави. Белорусец ненаметливо и суптилно, но сепак прецизно и јасно ги отсликува влијанијата на траумата од историските случувања врз интимниот секојдневен живот на луѓето. Пренесувајќи ги приказните во доменот на фикцијата и создавајќи хибридна книга, авторката слика фрагментарна и интимна панорама на болките на нашето време.
Меланхоличните, романтични и иронични кратки прози од „Среќни падови“ се дополнети со дваесетина фотографии на Евгенија Белорусец кои со својот лирски и историски контрапункт формираат сопствен впечатлив визуелен наратив.

„Расказите на Белорусец го евоцираат фаталистичкиот хумор на маргинализираните жени кои ни се откриваат како неочекувани, а сепак толку очигледни хероини.“
„Њујоркер“

„Белорусец ги доловува неверојатните животи на обичните Украинки среде политичките бури од последните две децении. Книгата е полифоничен портрет на едно општество, во кој фрагментите варираат од апсурдност до нежна романтика.“
„Паблишерс викли“

За авторката:

Евгенија Белорусец (Киев, 1980) е украинска фотографка и писателка. Работи како фоторепортерка за повеќе европски медиуми, меѓу кои и реномираниот германски весник „Дер Шпигел“. Членува во интердисциплинарниот уметнички колектив „Худрада“ и основачка е на списанието за уметности „Простори“.
Пишува раскази, дневници и репортажи. Нејзината прва книга „Среќни падови“ е објавена во Украина во 2018 година, а подоцна и преведена на десетина светски јазици. Авторка е на книгите „Модерно животно“ (2021) и „Воен дневник“ (2023). Живее и работи во Берлин и во Киев.

За преведувачот:

Андреј Јованчевски (1992, Скопје) — славист, книжевен преведувач, толкувач, уредник и раководител на неколку културни иницијативи. Студирал општа и компаративна книжевност и славистика на Филолошкиот факултет „Блаже Конески“ во Скопје. Како истражувач на литературната историја, на книжевните теории и на словенските јазици и литературни традиции, редовно учествува во разни академски публикации и настани. Автор на десет издадени книжевни преводи, уредник на стотина изданија за неколку македонски издавачки куќи, преведувач и автор на повеќе објавени есеи, извадоци и засебни поглавја во списанија и монографии. Водел преведувачки проекти и демонстраторски вежби по историја на руската книжевност на матичниот универзитет. Активно се занимава со меѓујазично толкување и со задачи поврзани со генерирање и анализа на пишувани содржини на неколку природни јазици. Основач и управител на културниот простор „Буква“ и на студиото за визуелни приказни „MultiQi“. Главен уредник на издавачката куќа „Аз-Буки“. Иницијатор и учесник во неколку локални и меѓународни проекти од различни домени на културата.

Авторка: Евгенија Белорусец

Издавач: Арт Конект

Едиција: Измислени светови

Наслов на оригиналот: Щасливі падіння / Євгенія Бєлорусець

Број на страници: 148

Формат: е-книга

Година: 2025

ISBN: 978-608-5058-16-7